CENTVRIE TIERCE
From Ocean
|
LES PROPHETIES DE M. NOSTRADAMUS |
1 APRES combat & bataille nauale,
Le grand Neptune à son plus hault beffroy,
Rouge auersaire defraieur viendra pasle,
Metant le grand ocean en effroy.
2 Le diuin verbe donrra à la substance
Copris ciel terre, or occult au fait mystique
Corps, ame, esprit aiant toute puissance,
Tant sous ses pieds, come au siege celique.
3 Mars & Mercure & l'arget ioint ensemble
Vers le midi extreme siccité:
Au fond d'Asie on dira terre tremble,
Corinthe, Ephese lors en perplexité.
4 Quad seront proches le defaut des lunaires,
De l' vn а l'autre ne distant grandement,
Froid, siccité, danger vers les frontieres,
Mesmes ou l'oracle a prins commencemet.
5 Pres, loing defaut de deux grand luminaires
Qui suruiendra entre l'Auril & Mars.
O quel cherté mais deux grands debonaires
Par terre & mer secourront toutes pars.
6 Dans temples clos le foudre y entrera,
Les citadins dedans leurs forts greués:
Cheuaux, beufs, homes. l'ode mur touchera,
Par faim, soif sous les plus foibles arnés.
7 Les fuitifs, feu du ciel sus les piques:
Conflit prochain des corbeaux s'esbatans,
De terre on crie aide secour celiques,
Quand pres des murs seront les combatans.
8 Les Cimbres ioints auecques leurs voisins,
Depopuler viendront presque l'Hespaigne:
Gents amassés Guienne & Limosins
Seront en ligue, & leur feront compaignie.
9 Bourdeaux, Rouen & la Rochele ioints
Tiendront au tour la grand mer oceane:
Anglois, Bretons & les Flamans conioints
Les chasseront iusque au-pres de Roane
10 De sang & faim plus grande calamité
Sept fois s'apreste а la marine plage,
Monech de faim, lieu prins, captiuité,
Le grand mené croc en ferrée caige.
11 Les armes batre au ciel longue saison,
L'arbre au milieu de la cité tumbé:
Vermine, rongne, glaiue en face tyson,
Lors le monarque d'Hadrie succombé.
12 Par la tumeur de Heb. Po, Tag. Timbre & Rosne
Et par l'estang Leman & Aretin,
Les deux grans chefs & cites de Garonne
Prins, morts, noies. Partir humain butin.
13 Par foudre en l'arche or & argent fondu:
Des deux captifs l' vn l'autre mangera:
De la cité le plus grand estendu,
Quand submergée la classe nagera.
14 Par le rameau du vaillant personage
De France infime: par le pere infelice
Honneurs, richesses trauail en son viel aage
Pour auoir creu le conseil d'homme nice.
15 Cueur, vigueur, gloire le regne changera
De tous points contre aiant son aduersaire.
Lors France enfance par mort subiuguera.
Le grand regent sera lors plus contraire.
16 Le prince Anglois Mars à son cueur de ciel
Voudra poursuiure sa fortune prospere,
Des deux duelles l' vn percera le fiel:
Hay de lui, bien aymé de sa mere.
17 Mont Auentine brusler nuit sera veu:
Le ciel obscur tout à vn coup en Flandres,
Quand le monarque chassera son nepueu:
Leurs ges d Eglise cometront les escladres.
18 Apres la pluie laict assés longuete,
En plusieurs lieux de Reins le ciel touché
Helasquel meurtre de seng pres d'eux s'apreste.
Peres & filz rois n'oseront aprocher.
19 En Luques sang & laict viendra plouuoir:
Vn peu deuant changement de preteur,
Grad peste & guerre, faim & soif fera voyr
Loing, ou mourra leur prince recteur.
20 Par les contrées du grand fleuue Bethique
Loing d'Ibere, au regne de Granade,
Croix repoussées par gens Mahumetiques
Vn de Cordube trahira la contrade.
21 Au crustamin par mer Hadriatique
Apparoistra vn horride poisson,
De face humaine, & la fin aquatique,
Qui se prendra dehors de l'ameзon.
22 Six iours l'assaut deuant cité donné:
Liurée sera forte & aspre bataille:
Trois la rendront & а eux pardonné:
Le reste а feu & sang tranche traille.
23 Si France passes outre mer lygustique,
Tu te verras en isles & mers enclos:
Mahomet cotraire: plus mer Hadriatique:
Cheuaux & d'asnes tu rougeras les os.
24 De l'entreprinse grande confusion,
Perte de gens, thresor innumerable:
Tu ny dois faire encor extension
France a mon dire fais que sois recordable.
25 Qui au royaume Nauarrois paruiendra
Quand de Secile & naples seront ioints:
Bigorre & Landes par Foyx Loron tiendra,
D' vn qui d'Hespaigne sera par trop coioint.
26 Des rois & princes dresseront simulacres,
Augures, creuz esleués aruspices:
Corne, victime d'orée, & d'azur, d'acre:
Interpretés seront les extispices.
27 Prince Libyque puissant en Occident
Francois d'Arabe viendra tant enflammer:
Scauans aux letres fera condescendent,
La langue Arabe en Francois translater.
28 De terre foible & pauure parentele,
Par bout & paix paruiendra dans l'empire.
Long temps regner vne ieune femele,
Qu'oncq en regne n'en suruint vn si pire.
29 Les deux nepueus en diuers lieux nourris:
Nauale pugne, terre, peres tumbés
Viendront si haut esleués enguerris
Venger l'iniure: ennemis succombés.
30 Celuy qu'en luite & fer au fait bellique,
Aura porté plus grand que lui le pris,
De nuit au lit six lui feront la pique,
Nud sans harnois subit sera surpris.
31 Aux chaps de Mede, d'Arabe & d'Armenie,
Deux grands copies trois foys s'assemblerot:
Pres du riuage d'Araxes la mesnie,
Du grand Solman en terre tomberont.
32 Le grand sepulcre du peuple Aquitanique
S'aprochera aupres de la Tousquane,
Quad Mars sera pres du coing Germanique,
Et au terroir de la gent Mantuane.
33 En la cité ou le loup entrera,
Bien pres de lа les ennemis seront:
Copie estrange grand pais gastera.
Aux murs & Alpes les amis passeront.
34 Quand le defaut du soleil lors sera,
Sus le plain iour le monstre sera veu:
Tout autrement on l'interpretera,
Cherté n'a garde: nul ny aura pourueu.
35 Du plus profond de l'Occident d'Europe,
De pauures gens vn ieune enfant naistra,
Qui par sa langue seduira grande troupe:
Son bruit au regne d'Orient plus croistra.
36 Enseueli non mort apopletique
Sera trouué auoir les mains mangées:
Quand la cité damnera l heretique,
Qu'auoit leurs loys si leur sembloit chagées.
37 Auant l'assaut oraison prononcée:
Milan prins d'aigle par embusches deceuz:
Muraille antique par canons enfoncée,
Par feu & sang а mercy peu receuz.
38 La gent Gauloise & nation estrange
Outre les monts, morts prins & profligés:
Au mois contraire & proche de vendange
Par les seigneurs en accord redigés.
39 Les sept en trois mis en concorde
Pour subiuguer des alpes Apennines:
Mais la tempeste & Ligure couarde
Les profligent en subites ruines.
40 Le grand theatre se viendra redresser:
Les dez geté, & les rets ia tendus.
Trop le premier en glaz viendra lasser,
Par arcs prostraits de log temps ia fendus.
41 Bosseu sera esleu par le conseil,
Plus hideux monstre en terre n'aperceu.
Le coup voulant prelat creuera l'oeil:
Le traistre au roy pour fidele receu.
42 L'enfant naistra à deux dents à la gorge
Pierres en Tuscie par pluie tomberont:
Peu d'ans apres ne sera bled, ne orge,
Pour saouler ceux qui de faim failliront.
43 Gents d'alentour de Tarn, Loth, & Garone,
Gardés les monts Apennines passer,
Vostre tombeau pres de Rome & d'Ancone
Le noir poil crespe fera trophée dresser.
44 Quand l'animal а l'homme domestique
Apres grads peines & saults viendra parler:
Le foudre а vierge sera si maleficque,
De terre prinse, & suspendue en l'air.
45 Les cinq estranges entrés dedans le temple,
Leur sang viendra la terre prophaner:
Aux Thoulousains sera bien dur exemple
D' un qui viendra ses loys exterminer.
46 Le ciel (de Plancus la cité) nous presaige
Par clairs insignes & par estoiles fixes,
Que de son change subit s'aproche l'aage,
Ne pour son bien, ne pour ses malefices.
47 Le vieux monarche deschassé de son regne
Aux Orients son secours ira querre:
Pour peur des croix pliera son enseigne:
En Mitilene ira pour port et terre.
48 Sept cents captifs estaches rudement
Pour la moitie meurtrir, donné le sort,
Le proche espoir viendra si promptement,
Mais non si tost qu' une quinzieme mort.
49 Regne Gauloys tu seras bien changé:
En lieu estrange est translaté l'empire
En autres meurs, & loys seras rangé:
Rouan & Chartres te feront bien du pire.
50 La republicque de la grande cité
A grand rigeur ne voudra consentir:
Roy sortir hors par trompete cité
L'eschele au mur, la cité repentir.
51 PARIS coiure vn grand meurtre cometre,
Bloys le fera sortir en plain effet:
Ceux d'Orleans voudrot leur chef remetre,
Angiers, Troye, lagres leur ferotgradforfait.
52 En la Campaigne sera si longue pluie,
Et en la Pouile si grande siccité.
Coq verra l'aigle, l'aesle mal accomplie:
Par Lyon mise sera en extremité.
53 Quand le plus grand emportera le pris
De Nureberg d'Auspourg, & ceux de Basle
Par Aggripine chef Francqfort repris
Transuerserot par Flamans iusques en Gale.
54 L' un des plus grands fuira aux Hespaignes
Qu'en longue plaie apres viendra saigner:
Passant copies par les hautes montaignes
Deuastant tout & puis en paix regner.
55 En l'an qu' un oeil en France regnera,
La court sera а vn bien fascheux trouble:
Le grand de Bloys son ami tuera:
Le regne mis en mal & doute double.
56 Montauban, Nismes, Auignon & Besier,
Peste, tonnerre & gresle à fin de Mars:
De Paris pont, Lyon mur, Montpellier,
Depuis six cent & sept XXIII. pars.
57 Sept foys changer verrés gent Britannique
Taintz en sang en deux cent nonante an:
Franche non point par apui Germanique.
Aries doute son pole Bastarnan.
58 Aupres du Rin des montaignes Noriques
Naistra vn grand de gents trop tart venu,
Qui defendra SAVROME & Pannoniques,
Qu'on ne saura qu'il sera deuenu.
59 Barbare empire par le tiers vsurpé
La plus grad part de son sang metra а mort:
Par mort senile par luy le quart frapé,
Pour peur que sang par le sang ne soit mort.
60 Par toute Asie grande proscription,
Mesmes en Mysie, Lysie & Pamphylie:
Sang versera par absolution
D' un ieune noir rempli de felonnie.
61 La grande bande & secte crucigere
Se dressera en Mesopotamie:
Du proche fleuue compaignie legiere,
Que telle loy tiendra pour ennemie.
62 Proche del duero par mer Tyrrene close
Viendra percer les grands monts Pyrenées.
La main plus courte & sa percée gloze,
A Carcassonne conduira ses menées.
63 Romain pouuoir sera du tout abas,
Son grand voysin imiter ses vestiges:
Occultes haines ciuiles, & debats
Retarderont aux bouffons leurs foligges.
64 Le chef de Perse remplira grande OLXADES
Classe trireme contre gent Mahumetique
De Parthe, & Mede: & piller les Cyclades:
Repos long temps au grand port Ionique.
65 Quand le sepulcre du grad Romain trouué,
Le iour apres sera esleu pontife,
Du Senat gueres il ne sera prouué
Empoisonné son sang au sacré scyphe.
66 Le grand baillif d'Orleans mis а mort
Sera par vn de sang vindicatif:
De mort merite ne mourra, ne par sort:
Des pieds & mains mal le faisoit captif.
67 Vne nouuele secte de Philosophes
Mesprisant mort, or, honneurs & richesses,
Des monts Germains ne seront limitrophes:
A les ensuiure auront apui & presses.
68 Peuple sans chef d'Espagne & d'Italie
Morts, profligés dedans le Cherronnesse:
Leur duyct trahi par legiere folie
Le sang nager par tout а la trauerse.
69 Grand exercite conduict par iouuenceau,
Se viendra rendre aux mains des ennemis:
Mais le viellart nay au demi pourceau,
Fera Chalon & Mascon estre amis.
70 La grand Bretagne comprinse l'Angleterre
Viendra par eaux si hault а inunder
La ligue neufue d'Ausonne fera guerre,
Que cotre eux mesmes il se viendrot bader.
71 Ceux dans les isles de long temps assiegés
Prendront vigueur force contre ennemis:
Ceux par dehors morts de faim profligés,
En plus grand faim que iamais seront mis.
72 Le bon viellart tout vif enseueli,
Pres du grand fleuue par fauce souspeçon:
Le nouueau vieux de richesse ennobli
Prins au chemin tout l'or de la rançon.
73 Quand dans le regne paruiendra le boiteux
Competiteur aura proche bastard:
Luy & le regne viendront si fort rogneux,
Qu'ains qu'il guerisse son fait sera bien tard.
74 Naples, Florence, Fauence & Imole,
Seront en termes de telle facherie,
Que pour coplaire aux malheureux de Nolle,
Plainct d'auoir fait а son chef moquerie.
75 PAV, Veronne, Vicence, Sarragousse
De glaifues loings terroirs de sang humides:
Peste si grande viendra а la grand gousse
Proches secours, & bien loing les remedes.
76 En Germanie naistron: diuerses sectes,
S'approchans fort de l'heureux paganisme,
Le cueur captif & petites receptes,
Feront retour а payer le vray disme.
77 Le tiers climat soubz Aries comprins
Lan mil sept cens vingt & sept en Octobre,
Le roy de Perse par ceux d'Egypte prins:
Coflict, mort, p'(er)te: а la croix grad opprobre.
78 Le chef d'Escosse auec six d'Alemagne
Par gens de mer Orientaux captifs:
Transuerseront le Calpre & Hespagne
Present en Perse au nouueau roy craintif.
79 L'ordre fatal sempiternel par chaisne
Viendra tourner par ordre consequent:
Du port Phocen sera rompue la chaisne:
La cité prinse, l'ennemy quand & quand.
80 Du regne Anglois l'indigne deschassé,
Le conseillier par ire mis а feu:
Ses adherans iront si bas tracer,
Que le bastard sera demi receu.
81 Le grand criard sans honte audacieux,
Sera esleu gouuerneur de l'armée:
La hardiesse de son contentieux,
Le pont rompu, cité de peur pasmée.
82 Freins, Antibol, villes au tour de Nice,
Seront vastées fer, par mer & par terre:
Les sauterelles terre & mer vent propice,
Pris, morts, troussés, pilles sans loy de guerre.
83 Les lons cheueux de la Gaule Celtique
Accompagnés d'estranges nations,
Metront captif la gent Aquitanique,
Pour succomber а internitions.
84 La grand cité sera bien desolée,
Des habitans vn seul ny demeurra:
Mur, sexe, temple, & vierge violée
Par fer, feu, peste, canon peuple mourra.
85 La cité prinse par tromperie & fraude,
Par le moyen d' vn beau ieune atrapé:
Lassaut donné Roubine pres de l' AVDE
Luy & touts morts pour auoir bien tropé.
86 Le chef d'Ausonne aux Hespagnes ira
Par mer fera arrest dedans Marseille:
Auant sa mort vn long temps languira:
Apres sa mort lon verra grand merueille:
87 Classe Gauloyse n'aproches de Corseigne
Moins de sardaigne, tu t'en repentiras
Trestous mourrés frustrés de laide Grogne:
Sang nagera: captif ne me croyras.
88 De Barcelonne par mer si grand armee,
Toute Marseille de frayeur tremblera:
Isles saisies de mer aide fermée,
Ton traditeur en terre nagera.
89 En ce temps la sera frustré Cypres
De son secours, de ceux de mer Egée:
Vieux trucidés: mais par masles & lyphres
Seduict leur roy, royne plus outragée.
90 Le grand Satyre & Tigre de Hyrcanie,
Don presenté à ceux de l'Ocean:
Le chef de classe istra de Carmanie
Qui prendra terre au Tyrren Phocean.
91 L'arbre qu'auoit par log temps mort seché,
Dans vne nuit viendra а reuerdir:
Cron. roy malade, prince pied estaché
Craint d'ennemis fera voile bondir.
92 Le monde proche du dernier periode,
Saturne encor tard sera de retour:
Translat empire deuers nation Brodde:
L'oeil arraché а Narbon par Autour.
93 Dans Auignon tout le chef de l'empire
Fera arrest pour Paris desolé:
Tricast tiendra l'Annibalique ire:
Lyon par change sera mal consolé.
94 De cinq cent ans plus compte lon tiendra
Celuy qu'estoit l'ornement de son temps:
Puis а vn coup grande clarté donrra,
Que par ce siecle les rendra trescontens.
95 La loy Moricque on verra defaillir:
Apres vne autre beaucoup plus seductiue,
Boristhenes premier viendra faillir:
Pardons & langue vne plus attractiue.
96 Chef de FOVSSAN aura gorge couper
Par le ducteur du limier & leurier:
Le faict patré par ceux du mont TARPEE
Saturne en Leo X I I I. de Feurier.
97 Nouuelle loy terre neufue occuper
Vers la Syrie, Iudee, & Palestine:
Le grand empire barbare corruer,
Auant que Phebés son siecle determine.
98 Deus royals freres si fort guerroyeront
Qu'entre eux sera la guerre si mortelle,
Qu' vn chacun places fortes occuperont:
De regne & vie sera leur grand querele.
99 Aux chaps herbeux d'Alei & du Varneigne,
Du mont Lebron proche de la Durance,
Camp de deux pars conflict sera sy aigre:
Mesopotamie defallira en la France.
100 Entre Gaulois le dernier honoré.
D'homme ennemi sera victorieux:
Force & terroir en moment exploré,
D' vn coup de trait quand mourra l'enuieux.
P R O P H E T I E S
D E
M: N O S T R A D A M V S.
